هلاوس الصبحيه عن الوحده المعارضيه

معلش بقى ... في حاجه انا حاموت و افهمها
دلوقتي عندنا بسم الله ما شاء الله , اسهال في حملات طرق الابواب
ايمن نور
البرادعي
حمدين صباحي

كله بينزل المحافظات و بيمشي في الشارع وسط الناس و بيعمل احلى شغل .... الله ينور
جميل جدا ان الناس تشوف مرشحين الرئاسه المحتملين ماشيين وسطهم و بيسلمو عليهم و بيتكلمو معاهم

رائع
ممتاز

سؤال بقى
كل واحد فيكو بينزل لوحده ... ليه ؟ انتو لامؤاخذه ناويين تنافسوا بعض و لا ايه ؟
ناويين تنزلو الانتخابات ضد بعض و لا حاجه ؟
عشان نفهم بس

مش المفروض في كيان جامع دلوقتي اسمه الجمعية الوطنيه للتغيير ؟ ... طويب
لو الكلام دا صح ... مش المفروض حيبقى ليه مرشح موحد لانتخابات الرئاسه حنقف كلنا وراه بغض النظر عن هو مين ؟

لو الكلام دا مش في نية الساده الافاضل المحترمين المرشحين التلاته
يبقى سوري يعني في اللفظ .... أحيه يا بو سوسو

طبعا احنا ناس وطنيين و كويسين و بنشرب اللبن قبل ما ننام فيبقى ما فيش ابو سوسو

طب لما الحياه حلوة كده و كلنا على قلب رجل واحد " افترض معايا معلش "
الساده الافاضل هما و بقية قيادات الجمعية ما بيعملوش حملات طرق الابواب دي مع بعض ليه باسم الجمعيه ؟؟؟

لو حد عنده اجابه منطقيه يا ريت يرسيني ... عشان انتو عارفين اني ابريلي و طالما الاجابه مافهاش شو اعلامي يبقى ماعرفهاش

خلصنا هزار ... نتكلم بقى جد

السبب بكل صراحه من وجهة نظري المتواضعه
مش في ايمن نور و لا في حمدين صباحي و لا اللي حواليهم لانهم اكيد حيرحبو بعمل مشترك قوي زي دا لان دا اللي كان نفسهم فيه كلهم من ايام تاسيس الحملة المصرية ضد التوريث

و اكيد برضو السبب مش في الدكتور البرادعي الراجل المثقف الواعي صاحب الحس الوطني الرفيع

السبب بقى ... ان شوية الاطفال اللي بشنبات اللي حوالين البرادعي ... مصرين يتعاملو مع الراجل على انه عربيه بريليانس و هما توكيل ابو الفتوح

فاكرين عاوز نوكيا روح لرايه ؟
بقت عاوز البرادعي روح للحمله ... و يالها من مصادفه اذ كانت حملة دعاية نوكيا التليفزيونيه مكونة من عدد اتنين بغبغان " اوعو حد يفهمني صح "

و الالذ بقى الحجه الابديه ايه ؟
ان ايمن و حمدين و 6 ابريل و اللذي منه .. هي كيانات وسخه ماوراهاش غير حب الظهور و الشو الاعلامي و المتاجره بالقضايا و بتاع
و خايفين عمو ينزل معاهم هدومه تتوسخ و الاومو شاحح زي مانتو عارفين

الالذ و الالذ بقى ... ان شركة رايه ما بقتش واخده بالها انها عدت كل مستويات الوساخه في كل النقط اللي بتتهم بيها الفصائل السياسيه التانيه ... بجد عملو ارقام قياسيه
شوفو كام موقف معفن في 6 اشهر بس تقريبا

ايه الحل ؟ مش عارف الصراحه
بس بجد حد يفهمهم انهم قربو يدمرو البرادعي باسلوبهم دا
كفايه كده قبل ما اقبح 

ايه المطلوب عشان نحافظ على حياتنا ؟؟

طب دلوقتي بقى ايه المطلوب عشان الواحد ما يموتش من مبارك

الناس لا بقت بتدور على كرامه و لا بقت بتدور على حقوق اقتصاديه و لا سياسيه و لا مهلبيه

الناس نفسها تعيش بس مش اكتر

نفسها لما تقف ف كمين تتشتم و تتهزق و تنضرب و تتعذب و تلبس قضيه بس من غير ما يتقتلو

نفسهم لما يروحو يراقبو ف الامتحانات ف المحافظات لو تعبو مستشفى ترضى تعالجهم او على الاقل يسيبوهم يرجعو بلدهم

نفسهم لما يركبو قطر يوصلو بالسلامه من غير ما يتحرقو و لا يلبسو ف قطر تاني

نفسهم لما يركبو عباره و تغرق يلاقو حد يروح ينقذهم

نفسهم لو اتخانقو مع مخبر ف الشارع مايقتلهمش

للاسف

مافيش حل غير ان مبارك يغور

و للحديث بقيه