بالأمس و تقريبا في نفس الوقت الذي كان الرئيس مبارك يتبجح فيه بما وصلت اليه الديمقراطية و الحقوق السياسية في مصر , كانت لجنة شئون الأحزاب برئاسة صفوت الشريف و بعضوية حبيب العادلي و شخصيات أخرى مثل مفيد شهاب و باقي فريق الكورة - و هي كما هو واضح ليست هي بالظبط اللجنة المثالية للتحكم في مقدرات الحياة الحزبية المصرية - ترفض للمرة الثالثة تأسيس حزب الوسط الذي يضم نخبة من شرفاء مصر اللذين لا بد أن تشكيلهم لحزب هو إضافة للحياة السياسية المصرية , فهم على الأقل لن يكونوا كشكا جديدا من الأكشاك السياسية اللتي تم الموافقة عليها من باب مجاملة هؤلاء لما أدوه من خدمات للنظام كمعارضين صوريين على مدار ال ३० عاما الماضية ।
و بغض النظر عن الرفض لأنه شئ متوقع طبعا من لجنة بها العادلي و الشريف و شهاب , و هم شخصيات لكل منها باع طويل في تخريب الحياة السياسية في مصر على مدار سنوات طويلة , و لكن النقطة هي سبب الرفض ... طرطق ودانك و النبي كده ياخويا معلش و ركز معايا شوية و استحمل معايا الشلل اللي حانتشله دلوقت دا
بيقوللك إن الحزب إترفض لعدم تميز برنامجه !!
أنا لا حاتكلم في البرنامج و لا عن حزب الوسط و لا عن أي حاجة من الكلام دا خالص , أنا بس عاوز حد يفهمني يمكن أنا اللي حمار , ايه مايتين أم التميز اللي اللجنة دي شافته في أحزاب زي بتاعة وحيد الأقصري و بتاع عم الحاج الصباحي أبو طربوش- الله يرحمه - مثلا ؟؟؟
بلاش دي , طب ايه التميز اللي في برنامج الحزب الوطني طيب ؟؟
لا بس بصراحة , الحزب الوطني لو على التميز فهو متميز طبعا مافهاش كلام , قوللي على حزب واحد في تاريخ مصرعمل في مصر و المصريين اللي الحزب الوطني عمله ؟
الحقيقة إن الأسباب الحقيقية لرفض حزب متميز زي حزب الوسط معروفة للكل , و هو انهم حياخدوا النص مليون جنيه السنوية بتاعة الحكومة و حيشتغلوا بيها بجد , مش حيشتروا بيها شقق و لا عربيات و لا حيعلقوا بيها يفط تأييد للرئيس مبارك !!!
مش عارف ليه دايما باحس إن لجنة الأحزاب دي عاملة زي لجنة تحكيم مسابقة ملكات جمال , المتسابقات هما زبيدة ثروت و مريم فخر الدين و نيللي , و أعضاء لجنة التحكيم ماري منيب و زينات صدقي و عائشة الكيلاني !!
ليست هناك تعليقات:
إرسال تعليق